Хуршеди ҳар ду олам, ё Мустафо, Муҳаммад!

Афзал ба насли Одам, ё Мустафо, Муҳаммад!

Лоиқи васлу дидор, рӯзи ҳисоб як бор,

Раҳме намо ба ҳолам, ё Мустафо, Муҳаммад!

Хоки раҳат ба дида аз хирмани ту чида  

Чун тутиё бимолам, ё Мустафо, Муҳаммад!

Фармуд Худои аъло: Зикри ту ҳаст боло

Эй ёри бемисолам, ё Мустафо, Муҳаммад!

Ман ошиқи каломат, гӯям басе саломат,

Ҳар лаҳза рӯзу солам, ё Мустафо, Муҳаммад!

Шофеи ҷумла уммат, дар сахтии қиёмат,

Умеди безаволам, ё Мустафо, Муҳаммад!

Чун фарди пургуноҳам, бингар ту ашку оҳам

Дармон намо ду болам, ё Мустафо, Муҳаммад