Худои Мутаол дар ояти 7 сураи Қасас мефармояд:
 وَأَوْحَيْنَا إِلَى أُمِّ مُوسَى أَنْ أَرْضِعِيهِ فَإِذَا خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا تَحْزَنِي إِنَّا رَادُّوهُ إِلَيْكِ وَجَاعِلُوهُ مِنَ الْمُرْسَلِينَ
Ва мо ба модари Мусо(а) ваҳй кардем, ки ӯро шир бидеҳ. Пас ҳар гоҳ (аз фиръавниён) бар ӯ бимнок шудӣ, ӯро дар сандуқчае гузошта ва ба дарё бияндоз ва аз ин фармон натарс ва аз дурияш ғамгин набош, зеро мо ӯро ба ту бозмегардонем ва ӯро аз паёмбарон мегардонем.
Нуктаҳо
Ба Фиръавн гуфта шуда буд, ки имсол кӯдаке ба дунё меояд, ки агар бузург шавад туро сарнагун мекунад. Ӯ дастур дод ҳамаи навзодоне, ки ба дунё меоянд бикушанд, аммо ҳамин ки Мусо(а) ба дунё омад, Худованд ба модараш илҳом кард, ки ба ӯ шир бидиҳад. Онгоҳ дар сандуқчае бигузорад ва ба дарё андозад.
Дар ин оят нисбат ба модари ҳазрати Мусо(а) ду амр, ду наҳй ва ду башорат омадааст.
Калимаи хавф дар мавориди эҳтимоли хатар ва калимаи ҳузн дар мавориди нигаронии қатъӣ ба кор меравад.
Мурод аз дарё дар ин оят руди азими Нил дар кишвари Миср аст, ки ба хотири бузургӣ ва азамат дарё хонда шудааст ва кохи Фиръавн дар соҳили он бино шуда буд.
Вақте Худованд бихоҳад душмани инсон низ маҳалли амн ва паноҳгоҳи ӯ мешавад.
Адӯ  шавад сабаби хайр агар Худо хоҳад.
***
Гар нигаҳдори ман он аст, ки ман медонам.
Шишаро дар бағали санг нигаҳ медорад
Паёмҳо
1. Дар изтиробҳо ва бунбастҳо Худованд беҳтарин ҳодӣ ва ҳомии мӯъминон аст. Модари Мусо(а) аз кушта шудани фарзандаш ба дасти сарбозони Фиръавн, хеле тарсида буд, вале Худованд ба ӯ илҳом кард, ки чигуна амал кунад. «اوحينا»
2. Зан низ метавонад мавриди илҳоми Илоҳӣ қарор гирад. «اوحينا الى امّ موسى»
3. Нузули имдодҳои ғайбӣ бо баҳрагирӣ аз имконоти моддӣ зид нест. Шир додан ва дар сандуқча гузоштан бо таваккул зиддият надорад. «ارضعيه»
4. Дар ҳеҷ шароите набояд шири модарро аз фарзанд дареғ дошт. «ارضعيه»
5. Дар дастуроти Илоҳӣ асроре нуҳуфта аст, ки шояд дар назари ибтидоӣ маъқул наёяд. «القيه فى اليم»
6. Дар роҳи иҷрои фармони Илоҳӣ на аз чизе битарсем ва на нисбат ба масоил нигарон бошем. «لا تخافى و لاتحزنى» 
Модари Мусо(а) ду нигаронӣ дошт; 1) тарс аз кушта шудани фарзанд, 2. ғами дурии фарзанд. Худованд ҳар дуро, ҳамонгуна ки дар оёти баъд мехонем ба беҳтарин роҳ ҳал кард.
7. Ончи дар роҳи Худованд дода шавад ба беҳтарин сурат бармегардад. «القيه - رادّوه، جاعلوه من المرسلين» 
Модари Мусо(а) ба фармони Худованд фарзандашро раҳо кард. Худованд ҳам ӯро баргардонд ва ҳам ба мақоми нубувват расонд.
8. Агар Худованд бихоҳад баъзе ахбори ғайбиро дар ихтиёри афроде қарор медиҳад. «جاعلوه من المرسلين»