Please update your Flash Player to view content.
Фарҳанг ва адаб
Матолиби тоза
Хоҳарам!
Хоҳарам гӯ, ки чаро ранги ба ранг омадаӣ?
Магар аз иффату покӣ ту ба танг омадаӣ?
Чӣ бадӣ дидӣ аз оёти Худованди раҳим
Ки ту бо мазҳаби Ислом ба ҷанг омадаӣ?
Носипосии Худо аз ту мусулмон зишт аст
Дилхушӣ ин ки ба анзор, қашанг омадаӣ?
Исмату дини ҷавонон ҳама бар бод диҳӣ
Чун ба ороишу пироҳани танг омадаӣ
Ба куҷо меравӣ аз хаймаи Заҳро, баргард
Сари чоҳи гунаҳу фитнаву нанг омадаӣ
Дил ба дарёи ҳавасҳо задаӣ, ғофил аз ин
Тӯъмае ҳастиву дар коми наҳанг омадаӣ
Ту чунон сайдиву сайёди ҳавас дар пайи туст
Аз чӣ дар маъракаи тиру хаданг омадаӣ?
Сайди сайёд шавад, кабки хиромандаи маст
Аз чӣ дар доми хатар масту маланг омадаӣ?
Чунки будаст ҳиҷобат, сипари тири нигоҳ
Пас чаро бесипар имрӯз ба ҷанг омадаӣ?
Буд тақвои ту з-ин маҳлакаҳо, пои гурез
Аз хатар чун бигурезӣ ту, ки ланг омадаӣ?
Ту гуле ҳастиву булҳавасон карда камин
Ҳамчу оина чаро маърази санг омадаӣ?
Ҷои ғафлат набувад, хоҳари ман қадр бидон
Ки дар ин дори фано, гӯш ба занг омадаӣ!
